Facebook Twitter Google +1     Admin

remenches dende l\'alto galligo

Dende l'Alto Galligo

Temas

Enlaces

Archivos

 

Se muestran los artículos pertenecientes a Agosto de 2014.

En a feria de Chaca

20140813082256-pict0012.jpg

Presentación de los libros “El aragonés en el siglo XXI. Informe” (Fundación Gaspar Torrente) de varios autores, y “Lingüística diatópica de l’Alto Aragón” (Consello d’a Fabla) de Francho Nagore.

Intervien: Iris Orosia Campos Bandrés, José Ignacio López Susín y Francho Nagore Laín.

13/08/2014 08:20. remenches #. sin tema

'poesía d’o corazón e d’o país'

20140829083611-guara-4.jpg

Ya s’ha dispertato Guara: poesía d’o corazón e d’o país

Reseña de: Óscar Latas Alegre, Ya s’ha dispertato Guara, Uesca, Publicazions d’o Consello d’a Fabla Aragonesa, 2011.

Con o títol amprato d’un berso publicato por Ana Abarca de Bolea en 1679, Ya s’ha dispertato Guara obtenió en 2009 un aczésit en a XIIena combocatoria d’o beterano premio pa libros de poesía en aragonés que leba chustamén o nombre d’ista escritora.

 L’autor, Óscar Latas, ha dixato ya un buen rastro d’a suya escritura en a nuestra luenga resultando reconoxito en buena cosa de premios literarios tanto en narratiba –L’ombre choto de Sobrarbe (2009), finalista en o I Certamen de relatos breves y cuentos “Junto al Fogaril” de L’Aínsa, Malinconía, triste chuego (2009), Chuegos florals. Repuis d’asperanza y malinconía (2012), Premio Arnal Cavero 2011, e 1911. Cartas dende Uesca, ganador en o I Concurso “Reino d’os Mallos”– como en poesía –Berari (2003), Sísolas (2004), Ortensia de Chudas (2004), que rezibió menzión en o Premio Arnal Cavero, Postaletas (2011)–. Antiparte, cal destacar tamién a nobela curta Pétalos de febrero en Bordeus. Gramática d’un desamor (2007) y cualques relatos más.

 A trabiés d’a suya obra ha feito traña ubrindo una nueba bisión marcata por un estilo prou personal, desconoxito dica no fa guaire en a nuestra luenga, e con una obra prolifica más que asentata e de gran calidá. Una obra que, sin garra duda, ye fendo a saber qué luz en a moderna literatura en aragonés «donando milenta colors á una luenga grisa».

Ya s’ha dispertato Guara ranca d’o ziclo bital d’o ser umano –e de tantos atros animals– y recorre por meyo de cuatre cabos, correspondiens a las cuatre estazions de l’año («Escritos enta una primabera nobalizia», «Escritos enta una sonrisa estibal», «Escritos enta un agüerro cutio» y «Escritos enta un ibierno sumanzio») un camín de sentimientos pero tamién bien sobén os suyos bersos son chupitos de reflesions y pensamientos personals. Cada parte ye dibidita en doze poemas –como si fuesen doze meses– sumando-ne en total cuaranta y güeito. Asinas, os recosiros, l’amor u a soledá fan buena pacha, s’achuntan y acucutan por as fuellas d’iste libret como fongos d’agüerro tenendo como fundo os mons berdes sarrableses u os paisaches (semi)urbanos oszenses. En iste sentito, de cabo cuan, se produz un contraste entre ixos dos ambiens, dos reflexos d’un mesmo mirallo.

 Ye una obra, como dezimos, enreligata e enradigata en os tarrancos d’o nuestro país y en a que son bien presens referenzias, toponimos e puestos altoaragoneses (Salas, Sarrablo, Galligo, Uesca, Perineus, Capitiellos, Auturía, Santa Orosia u mesmo en o títol: Guara), pero, con tot e con ixo, de bez tamién ye un conchunto global, que abraca atras latituz (Bicarrosse, Bordeus, Lisboa, Berlín u Amsterdam) alentando aires modernos e cosmopolitas.

 Cada estazión d’o poemario ye o reflexo d’un estato bital e animico, de sentimientos que florexen, que amanexen sin parar cuenta y que pueden enriquexer personalmén. Si a poesía ye sentimiento, aquí sobrexen sentimientos que esdebienen parolas clau como amor, beso, Perineus, suenios u remenches.

No nos queda soque recomendar que tos zabuquez en a letura d’iste libro e nadez entre os bersos d’as suyas fuellas escorrendo-los de buen implaz aprobeitando a suya sapia.

 Alberto Gracia Trell

[Fuellas, 219-220, (chinero-abril 2014), p. 36]

Etiquetas:

29/08/2014 08:37. remenches #. sin tema


Plantilla basada en http://blogtemplates.noipo.org/

Blog creado con Blogia. Esta web utiliza cookies para adaptarse a tus preferencias y analítica web.
Blogia apoya a la Fundación Josep Carreras.

Contrato Coloriuris