Reseñeta Pedro Arnal Cavero en 'Fuellas' 225-226 (chinero-abril 2015)

Arnal Cavero, Pedro, Somontano en alto. Escritos (1946-1959) e inéditos, ed., selec. e introd. de Alberto Gracia Trell, Zaragoza, Aladrada («Biblioteca de las Lenguas de Aragón», 14), 2014. [ISBN: 978-84-942470-2-6; 302 pp.]

             En o lumero catorze dera colezión «Biblioteca de las Lenguas de Aragón» que edita ra Sociedad Cultural Aladrada se poblica Somontano en alto. Escritos (1946-1959) e inéditos, libro que reproduze buena parte dera obra literaria dispersa dero mayestro altoaragonés Pedro Arnal Cavero. D’iste libro se son feitas ya tres presentazions; en a Feria d’o Libro Aragonés de Monzón, en Alquezra e en Uesca.

            Dera suya edizión e introduzión, ye autor o mayestro oszense Alberto Gracia Trell, autor de articlos como “Notas sobre l'aragonés de A lueca, de Chuana Coscujuela” (2008-2009) u “A luenga d' o Pregón d' as Fiestas de Nabal de 2008” (2010), entre atros, e coautor dero libro Agliberto Garcés (1908-2002). Obra en aragonés meridional (2013). Ya trató ra fegura de Arnal Cavero en un articlo que ye complementario á iste libro: “El pensamiento de Pedro Arnal Cavero en torno a la lengua aragonesa” (2012).

            A poblicazión dero libro, que coinzide con o ziento trenta cabo d'año dera naxedura de Pedro Arnal Cavero, fillo preclaro de l'Alto Aragón, cuenta con un prelogo de Víctor Juan, direutor dero Museo Pedagógico de Aragón e profesor unibersitario en o campus de Uesca, en do se balura a fegura d’iste escritor semontanés (pp. 7-11).

            En o amplo estudio introdutorio dera obra (pp. 13-38), destaca ro editor, Gracia Trell, que Arnal “fue uno de los pioneros en el uso del aragonés en la prensa escrita y, en gran parte de esos artículos, el aragonés jugó un papel clave” (p. 21). En relazión con a bida de Pedro Arnal, siñala que, anque naxito en 1884 de Belber d’a Zinca, tota ra suya bida chiró arredol de Alquezra e o Semontano de Balbastro. Arnal Cavero escribió una ampla obra que se prolongó dica pocos diyas antis dera suya muerte en l'año 1962. Mayestro zelebre, pos plegó enta ro lumero uno dero escalafón dero machisterio estatal, plasmó e recreyó as bellezas dero Alto Aragón, más que más a suya cultura, a fabla, os costumbres e as tradizions en bels zentenars de escritos. Asinas, ista poblicazión se chunta e completa con as atras obras dero autor sopre ro Alto Aragón como Aragón en alto (1940), Vocabulario del altoaragonés (de Alquézar y pueblos próximos) (1944), Refranes, dichos, mazadas… en la Montaña y Somontano oscense (1953) u Aragón de las tierras altas (1955), obras totas afamatas e impreszindibles pa ra conoxetura dera cultura propia dera nuestra tierra.

            Como ya se abanza en o tetulo, a obra ye trestallata en dos desiguals partes: escritos e ineditos. Asina e de un costato, iste libro recupera cuasi cuaranta testos olbidatos durante más de zincuanta años e que fuoron escritos e poblicatos entre ros años 1946 e 1959 en diferens meyos de comunicazión aragoneses (más que más, en o Heraldo de Aragón e, belatros pocos, en as rebistas Aragón e Zaragoza). En istos reflexa, en una cudiata luenga aragonesa, ra bida tradizional altoaragonesa e a tradizión oral de asabelas de chenerazions de semontaneses. Destacan sobremanera por o feito lingüistico ros articlos clamatos “O porrón d'iña Beniteta” (pp. 65-71), “As glarimas de San Lorenzo” (pp. 191-194), “Pilareta-Pilara-La Pilar” (pp. 246-250), “Carta de unos somontanos”, feito de traza epistolar e de raso en aragonés (pp. 207-209), e, por a suya graniza estensión, “Villa y aldeas en romería” (pp. 76-142), antis poblicato en o libro Costumbres y tradiciones: folclore aragonés, de 1948.

            D’atro costato, se i recullen bellos testos ineditos conserbatos en o archibo de Arnal, como “¡Bendita alcaldada!” (pp. 271-278) e “Si quieres vencer, ahorra” (pp. 279-282). Antimás, en a zaguera parte dero volumen, se incluye un trestallo do se reproduzen composizions populars de tradizión oral: o “Albada montañesa (Romance de Marichuana)” (pp. 285-289), “A Bartola” (p. 302) y os intresans ditos dera Pastorada de Santa María de Dulzis, datata en 1918 (pp. 290-301). Ye meninister siñalar que Arnal Cavero tamién reproduze bels trozez deros ditos d'ixa pastorada en o zitato articlo “Villa y aldeas en romería” (pp. 129-132).

            Ye de dar que iste sobrebuén libro, regular que ye un polito omenache d'Alberto Gracia á ra fabla dero Semontano, ixa tierra intermeya d’entre ras bals e o plano, en o que ro tiempo ye adormito, como cantaba José Antonio Labordeta en o suyo «Poema»: “allá arriba, en el pueblo vacío del lento Somontano”. Ya caleba.

 Óscar Latas Alegre, en 'Fuellas' 225-226 (chinero-abril 2015)