Santa Ilena, por M. Palacio Allué
Santa Ilena
Güena maitinada á toz y bien plegatos ta iste puesto maxico d’os mons de Pirene.
Os indixenas d’istos zinglos yeran chens parellas, mesmo en o paco que en o solano: Bal d’Ossau - tensinos; Belagua - Bearn; chistabins, belsetans, benasqueses - Bal d’Arán; ilergetes - oczitans. Toz con fablas pirenencas y toponimos parellanos, y lugars apaizitos en toz os puestos. Pedro IV fenezió en esfensa d’os Cataros, "os güenos ombres de a Oczitania". En plegar ta istas bals o cristianismo estioron sacralizatos os lugars maxicos d’os biellos cultos paganos –puntos de fuerzas teluricas, dólmens y menhirs, y fuens intermitens–, que se plenoron d’armitas, espitals de pelegrinos y un flumen d’eremitas y asabelos nombres sacros.
O lugar d’ista armita de Santa Ilena se troba con una marrosa de toponimos sacros y puestos maxicos: fuerzas teluricas en l’abside, fuen intermitén difuera, dólmens y menhirs en a redolada, a cueba, biella onsera con repuis de catirons d’onso y ocres indeszifrables en o teito. To isto aintro d’un flumen de toponimos sacros: Santa Ilena, San Felizes, Santa Engrazia, San Martín de Closura (espital chacobeo en ruinas), Samper (eremitorio d’Oz, aintro de l’arziprestazgo pelaire) y San Pelai de Gabín.
Yera santa Ilena d’orichen britanico, segundes rezenta o libro d’a "Invención de la Santa Cruz". Constancio Cloro, procónsul de Roma en a Britania, en un diya de boira preta se trafucó en os cantils d’a costa y comenzipió á demandar ausilio. Á ras suyas bozes respondió un choben que lo lebó ta casa suya. En plegar ta ista escubrió que yera una choben guerrera, en a mitolochía filla de Coel, personache lechendario. Plegó un inte en o que se cuacoron y prenioron matrimonio, d’o cualo naxió Constantino. En ista calendas, santa Ilena yera encara laica. Dezaga de beyer as persecuzions de Roma se torna cristiana.
En ixas calendas feneze o Zésar y Constacio Cloro ye lebato ta Roma, en a cuala fan un diumbirato ta o gubierno d’ista. En Roma prene en matrimonio a ra chirmana d’o suyo compai de gubierno, con o cualo repudia a Santa Ilena y o suyo fillo, que encara se troba en a Britania. Asabelo d’añadas ya biello, Constancio Cloro be de nombrar un suzesor. Os fillos que teneba con a romana no li cuacan cosa, asinas que s’alcuerda de Constantino y Santa Ilena, que fa lebar ta Roma, fendo emperador a ro suyo fillo Constantino.
En istas Santa Ilena yera en periglo politico y se’n fuye ta ro Bearne, en do teneba parentela. Como teneba miedo, trabesó os Pirineos por a Bal de Tena, y dezaga d’ella os romanos. Plegata ta o puesto d’a cueba de Santa Ilena, s’entutó en a cueba, ya cansa. En ixe inte, ascape, una araña, texió una telaraina que cubrió á ista. A persecuzión pasó d’o puesto dizindo: "Do l’araña texió, Santa Ilena no dentró".
Cuan a santa se trobó en Roma con o suyo fillo, "Emperador", se’n fue ta Cherusalén, en do trobó a cruz de Cristo en o mon d’o Calbario. Dimpués, con o poder d’estar emperatriz, fa una ilesia en o puesto d’a espelunga. A sacralizazión d’os lugars, fa que en o mesmo zinglo de Tendeñera, en o lugar de Torla, se trobe atra armita d’a santa, con cueba y fuen intermitén.
Biescas, uno de chulio de 2007 _ Maisimo PALACIO ALLUÉ [Fuellas d’informazión d’o Consello d’a Fabla Aragonesa, lum. 180-181 (chulio-otubre 2007), p. 16]
1 comentario
Una chesa -